Central YLA hruaitu nih Diltlang 'S' le Chawngte 'P' kar lam tuah cuahmah mi zohfelnak an ngei

Dated Lawngtlai, 2025 Nohawng 10 (Cawnnikhatni) : Nihin ah Central YLA hruaitu nih PMGSY chawva hmang in Diltlang 'S' le Chawngte 'P' kar lam remhthat cuahmah mi (Upgradation & Maintainance of Diltlang to Chawngte 'P' road) cu a hmun ah an va zoh.

Lam remhthatnak a hmun i zohfelnak ah hin Contractor hna he biaruahnak ngei in,  Pu Jh Lalrindik, Central YLA General Secretary nih cun '' Lairam chung ah cozah nih thanchonak rian a tuanmi hna hi kan zohfel lengmang cang lai, a sinak tak in tuan a si lo ah cun, hrawh zong a poi lo, a sinak tak in tuan a si cun a kauh khawhchung in chimrelpiak a si lai, tiah a chim. CYLA GS nih cun, an kan telpitu Sub-Hqrs le hika hmunram i Branch hruaitu hna cu kan ram ah riantuantu hna Contractor/company hna sinin hlawknak le zik la hlah u, pumpak zong chawva lak lo dingin le nan Area thanchonak rianțuan cu tha te'n zohfel u, tiah a chimchap.

CYLA Kumpuan Chairman Pu Alex Lalzawmpuia nih cun, thanchonak riantuan Contractor hna nih Sub-contract an pek tuk cun rian a hnuar, tuanmi a chia, Rural Area kan si bantukin kan ram ah riantuan nih an kan thlahdah, thlahthlam in an kan chiah in a lang, tiah a chim. Pu Eden Lalrammawia, CYLA Fin. Secretary le Pu Lalngaihzuala Fanchun, CYLA Treasurer nih cun, kan ram ah thanchonak rianțuan hi a chia ah aa chuah kan siang lo, kumsau daih dingin serpiak kan duh, rianchia cu zohfel zungzal a si lai, tiah an chim fawn.

Diltlang 'S' leh Chawngte 'P' kar lam remhthat cuahmahmi hi PMGSY tangka sing 3650 hmang in remh a si. Contractor pahnih an um i, Diltlang 'S' in Chawngte 'P' lam KM 15 sau hi, Pu Lalparmawia (Benjamin Construction) nih tuan in, Chawngte 'P' lam in Diltlang 'S' lam, Benjamin Construction tuan bang cu Pu Laldawngliana, Keifang khua nih a țuan. Hi lam remhthat hi tuanthawk a si in, thla 18 chung ah lim ding a si.

Hi rian hi 2024 Tho thla in tuan thawk ding a si lio ah Benjamin Consruction lei nih tukum Tangkhawng dihlai khan a thawk. Pu Laldawngliana hi nihin lawng in rian a domh. Rianthawk an tlainak kong chim in Contractor hna nih cun an seeh that lo ruang, thilri lakkhawmhnak ah harnak a um kong, lamremhnak thilri an test cuahmah kong, an chim. Central YLA duhning in, a sining ding in tuan an i timh kong an chim.

Published by CYLA Media Committee