Central YLA hruaitu ten Diltlang 'S' leh Chawngte 'P' inkar kawng siam mek an enfiah

Dated Lawngtlai, February 10, 2025 (Thawhtanni) : Vawiin khan Central YLA hruaitute chuan PMGSY sum sum hmanga Diltlang 'S' leh Chawngte 'P' inkar kawng siamṭhat mek (Upgradation & Maintainance of Diltlang to Chawngte 'P' road) chu a hmunah kalin an enfiah.

Kawng siamna hmunte enfiah paha Contractor te nen inkawmhona neihah Pu Jh. Lalrindika, Central YLA General Secretary chuan, Lairam chhunga sorkarin hmasawnna hna a thawh hrang hrangte chu an enfiah zel tur thu a sawi a. A nihna tur anga hnathawh a nih loh chuan tihchhiat mai pawh an hreh dawn lo tih sawiin, a nihna tur anga ṭha taka an thawh a nih erawh chuan a zau thei ang bera puanzar sak pawh an tum tih a sawi. Central YLA GS chuan anmahni ṭawiawmtu Sub-Hqrs. leh helai biala Branch hruaitute chu kan rama hnathawh a awmin contractor/company te hnen aṭangin hlawkna emaw therhlo emaw la lo turin a chah a, mimal ang pawha hamṭhatna la lo tura chahin, an area theuha hmasawnna hnathawh chu uluk taka vil turin a chah bawk.

CYLA Kumpuan Chairman Pu Alex Lalzawmpuia chuan, hmasawnna hna thawhah Contractor ten Sub-contract an pe tam lutuk ṭhin chuan hna a timuangin, hna a tichhe ṭhin tih thin a sawi a. Rural area kan nih avang hian kan rama hnathawktute hian min ngaihthah a, min namnul deuh niin a lang tih a sawi. Pu Eden Lalrammawia Chinzah, CYLA Fin. Secretary leh Pu Lalngaihzuala Fanchun, CYLA Treasurer te chuan, kan rama hmasawnna hnathawh hi chhe taka a chhuah hi kan phal lova, rotling, kum rei tak chhawr theih tura siam an duh thu an sawi a, hna tha lo chu an enzui zel tur an sawi bawk.

Diltlang 'S' leh Chawngte 'P' inkar kawng siam mek hi PMGSY sum cheng nuai 3650 hmanga siam a ni a, Contractor pahnih awmin, Diltlang 'S' aṭanga Chawngte 'P' lam KM 15 a thui hi Pu Lalparmawia (Benjamin Construction) ten thawkin, Chawngte 'P' lam aṭanga Diltlang 'S' lam, Benjamin Construction thawh bak zawng chu Pu Laldawngliana, Keifang khuain a thawk. He kawng siam hi thawh a nih aṭanga thla 18 chhunga thawh zawh tur a ni.

He hna hi October 2024 aṭang thawh ṭan tur a nih laiin, Benjamin Construction lam hian kumin January thla tawp aṭangin bul an ṭan a, Pu Laldawngliana hian vawiin aṭang chauhin hna a ṭan thung. Hna an ṭan muan chhan sawiin, contractor te chuan an khawl tluan loh vangte, hmanrua lakkhawm kawngah harsatna a awm thu leh kawng siam nan hmanrua an test mek te nghah a ngaih vang a nih thu an sawi. Central YLA duhdanin, a nihna tur ang leh a ṭha thei ang bera thawh an tum thu an sawi.

ISSUED BY CYLA MEDIA COMMITTEE, LAWNGTLAI