Hlukhla Kut 2025 hman zawh takah Phawngpui Photographer Association (PPA) ruahmannain Hlukhla Kut 2025 Miss thlanna neih a ni a, Hlukhla Kut 2025 Miss atan Sangau nula F. Lalramnunmawii thlan a ni.
F. Lalramnunmawii hi F. Sangiapa leh Lallawmremi te fanu niin, Zion Veng Sangau-I a cheng an ni a. Vohbik Thuthlungfa Kohhrana lawi an ni.
F. Lalramnunmawii chuan hetiang dinhmun thlentirtu Pathian chungah lawmthu a sawi a, Hlukhla Miss 2025 a nih theihna tura a buatsaihtu Organising Committee-te chungah thinlung taka lawmthu sawiin, mite hriat a nih ve theih nan buai chung chung a, a thlalakte pholan saktu PPA te chungah lawmthu a sawi bawk a ni.
F. Lalramnunmawii chuan amah tantu ten Hlukhla Miss a a telpui te chungah, Social media leh thildangah pawh nise tawngkam mawi lo an lo chhakchhuak palh thei tih sawiin, chutiang thilte a lo awm a nih chuan Pathian hminga ngaidam turin a ngen thu a sawi bawk.
'Hmalam hunah insiamthatna tur leh inzirna tur tam tak ka nei a, ka hriat loh leh ka thiamlohna te min hrilh a, min zirtir zel turin kan hruaitu te ka ngen tak meuh meuh che u a ni', tiin, Miss Hlukhla 2025 chuan, 'Lawngtlai lama kan unau ten kei tehlul min duhsak a, sum leh pai pawh nise thahnem tak min pek avang pawhin in chungah lawmthu ka sawi a. Kan Pathianin a let tam takin malsawm che u rawh se', a ti.
F. Lalramnunmawii hian Miss Contest ang chi hrim hrimah a la tel ngai loh thu a sawi a, hetiang dinhmun a thlen theihna chhan hi Pathian vang liau liua a nih thu a sawi.
1st Runner up atan AOC Veng, Lawngtlai nula Maria B. Lalramnghaki thlan a ni.
2nd Runner up atan Chandmari nula, Lawngtlai Lalrinngheti thlan a ni.
Issued by Central YLA Media Committee
Comments
Post a Comment